Gigén Lîvra

Al dscåurs ed Gigén quand, ai 15 ed mèrz dal 2019, int la sèla dal Cunsélli dla Cmóṅna ed Bulåggna i i an dè al Żigànt d Ôr

Sgnèra Vîz Sénndic, Sgnèr Asesåur, chèr amîg e invidè,

par mé, as capéss, l é un ôblig ringrazièr, mo an é mégga un quèl fâzil. A tacarò da lî, Sgnèra Vîz Sénndic, ch’la rapreṡänta tótt, e a i ażónt l asesåur e chi amîg ch’i an prupòst ed fèrum avair ste prèmi. Dåpp a un Żigànt d Ôr a Quinto Ferèri dal 1995 e a Fausto Carpàn dal 2007, adès a m é tuchè anc a mé: i gîv Giógglia? Siché dånca, anc par èser stè méss in cunpagnî con chi à fât un gran bän al dialàtt, par mé, inamurè ed Bulåggna e dla sô längua, l é un gran unåur.

Ho voluto iniziare in bolognese perché credo che il merito di questo Nettuno debba andare pure al sofferente dialàtt bulgnaiṡ, la mia lingua madre che non ho mai abbandonato.

E dunque grazie con tutto il cuore anche ai tanti presenti che, con la loro attività, contribuiscono a recuperare e mantenere ciò che rimane del nostro dialetto, seguitando a parlarlo, producendo scritti, poesie e rime, canzoni spesso stupende, testi e recite teatrali, spettacoli di burattini, occasioni preziosissime capaci anche di rinsaldare i legami di una comunità.
Grazie a chi studia, indaga e divulga anche dall’estero (come il mio caro coautore Daniele Vitali), a chi pubblica in Ortografia Lessicografica Moderna come Pèndragon. Grazie a chi organizza corsi di dialetto (Roberto Serra, il Ponte della Bionda, Aldo Jani, Rovinetti Brazzi), corsi i cui allievi – in 15 anni – hanno superato l’impensabile cifra di mille.

Le lingue locali sono patrimoni di enorme importanza, da considerare alla stessa stregua di un monumento prestigioso, di una celebre opera d’arte, dell’inestimabile cultura gastronomica di un territorio. Se sparisse un monumento emblematico come – poniamo – le Due Torri è ovvio che tutti la considereremmo una tragica sciagura. Lo stesso vale per un bene immateriale come la lingua di una città. Bisogna dunque impedire che i cosiddetti dialetti muoiano. Vanno salvati e divulgati.

È un’operazione che possiamo definire lodevole quando riguarda iniziative di volontari come gli ostinati della Bâla dal bulgnaiṡ, credo invece diventi doverosa se promossa dalle Pubbliche Istituzioni.
Una cittadinanza che perde la propria parlata è maggiormente esposta al rischio di diventare un’indistinta massa d’individui acritici, facilmente condizionabili.

Bologna ha – e deve continuare ad avere – il suo gusto preciso e riconoscibile fra mille, formato certo da un patrimonio culturale e artistico ricchissimo, antico e moderno, dalla sua cucina, dal suo folclore, da secoli di storia, dalle tradizioni, ma certamente anche dal suo dialetto.

Persino l’UNESCO, nel suo Atlante delle Lingue in pericolo, ha riconosciuto che le lingue locali emiliane, di cui il bolognese è parte fondamentale, sono “lingue da salvare”, con proprie identità e dignità specifiche rispetto all’italiano.

Signora Vice Sindaco, Signor Assessore, GRAZIE per questo segnale di attenzione che spero vada oltre la mia persona. Vi prego di non demordere, di usare, solo per fare un esempio, le possibilità offerte dalla Regione con la sua Legge per la tutela dei dialetti. Sostenete sempre di più iniziative dove il dialetto ritrovi spazio e considerazione, per restituire a Bologna il ruolo centrale che merita anche in questo campo.

Già nel 1964, il grande glottologo bolognese Alberto Menarini diceva: “Occorre salvare dall’oblio un enorme patrimonio lessicale, ricco di tradizioni, colorito ed efficace, dai mille registri, che fino a non molti anni fa era la lingua primaria dei bolognesi”. Intendiamoci, nessuno di noi s’illude. Siamo consapevoli che questa sontuosa lingua locale non potrà MAI PIÙ essere usata da tutti i bolognesi, com’era ai tempi della mia infanzia e giovinezza. Sperarlo sarebbe un’utopia. Però possiamo fare tanto per scongiurare una totale scomparsa del bolognese, valorizzandolo non solo come patrimonio distintivo della nostra comunità ma anche come sorprendente strumento di inclusione.

Un altro bolognese illustre, Pasolini, più di 40 anni fa, indicava come nodo centrale della nostra cultura la questione della scomparsa totale delle lingue dialettali. Sottolineava come la conservazione e la valorizzazione delle culture e delle lingue locali siano temi di tutti e quanto sia assurdo lasciarli appannaggio solo di una parte. Si tratta di valori, problemi, amori, rimpianti che accomunano, valori genuinamente democratici.

Insomma, per ognuno di noi una Bologna senza dialetto sarebbe come un tortellino senza ripieno, un turtlén scapè, come una tagliatella senza ragù, come una Bologna senza portici. Credo che non piacerebbe a nessuno. Grâzie a tótt e vîva al dialàtt bulgnaiṡ!

Gigén Lîvra l é un talànt ed tótti äl fâta, che da una vétta al scrîv e l armaṡṡda al sarvézzi dal bulgnaiṡ, pr arcurdèr sänper a tótt i bulgnîṡ che al nòstr idiòma al n à brîṡa da sparîr, e che quasst al dipànnd da nuèter. Autåur dla traṡmisiån par râdio La butaiga dal dialàtt, inventåur dla rubrîca giurnalésstica Dî bän só, fantèṡma!, co-autåur dal vocabolèri tascâbil ed bulgnaiṡ publichè dala Valèrdi e autåur d un vaniżén ed lîber såura al bulgnaiṡ ch’al fà par purtèr avanti l’ôvra d Alberto Mnarén, seguitànd anc al sô stîl particolèr, fén a tradutåur in bulgnaiṡ d autûr furastîr, Gigén Lîvra l’é una parsåṅna mudèsta e ritirè, acsé Al Sît Bulgnaiṡ al póbblica sta pâgina cåntr al sô parair, e al le fà parché al pänsa che äl poeṡî e äl zirudèl ed st autåur, spiritåuṡi, inteligiänti e créttichi dla sozietè mudêrna, äl séppen da fèr cgnósser al pió ch’as pôl, anc par la längua ch’al drôva, un bulgnaiṡ natt e tirè a lósster, ch’al måsstra sänper una rizairca int i tèst antîg e int la memòria.

Luigi Lepri è un talento multiforme, che da tanti anni scrive e fa animazione al servizio del bolognese, ricordando costantemente a tutti i bolognesi che il nostro idioma non deve sparire, e che ciò dipende da noi. Autore della trasmissione radiofonica La butaiga dal dialàtt, inventore della rubrica giornalistica Dî bän só, fantèṡma!, coautore del dizionario tascabile di bolognese pubblicato dalla Vallardi e autore di un gran numero di libri sul bolognese volti a proseguire l’opera di Alberto Menarini, di cui mantiene anche il caratteristico stile, nonché traduttore in bolognese di autori stranieri, Luigi Lepri è una persona modesta e schiva, così che il Sito Bolognese pubblica la presente pagina contro il suo volere, e lo fa perché ritiene che le poesie e zirudelle di quest’autore, spiritose, intelligenti e critiche verso la società moderna, siano da divulgare il più possibile, anche per la lingua usata, un bolognese pulito e curato, che tradisce sempre una ricerca nei testi antichi e un ripescaggio nella memoria.

L eròe e al canarén (1984)

Zirudèla, che ignurànt
ch’a sån stè. Am véns in mänt,
con n’idéa da radichèl,
d avrîr sóbbit al spurtèl
dal gabiòt dal canarén.
Mé a pensèva: - al limalén
ch’l é stè sänper parṡunîr,
che l à tgnó sänper sufrîr,
l à da avair la libartè.
Và mò là, våula int al prè!

st pasaròt d un bèl żaltén
l um guardé con chi dû ucén
cómm a dîrum, cèr e tånnd:
- Grâzie, a vâg a vaddr al månnd.
E pó, in st mänter ch’al s n andèva
par la fnèstra, mé a m sintêva
(a l cunfès con un pô ed bòria)
un eròe ch’pâsa ala stòria
quèṡi cómm Gujêlum Tell...
såul pr avair mulè un uṡèl.
Ai ò vésst pò ch’al vulèva
tótt felîz. Al stufilèva
såura un âlber dal żardén
e, dåpp fât un saltulén
såura un mûr vaird e bordó,
fenalmänt a n al vésst pió.

Sangu’ed Giûda, quassta é bèla.
Dåpp avair fât gabanèla
e arivè ch’a fó vêrs sîra,
a vadd môver la purtîra.
Só l mumänt a n i fâg chèṡ
mo, dåpp pôc, a préll al nèṡ
pr un tic-tic ch’a sént lé avṡén.

Bän, chi t vaddia? Al canarén
che, col bèc, fôrt al picèva
int la ghèbia, parché al vlêva
turnèr dänter in parṡån,
cal dṡgraziè d un maramàn!
A cminzé a séntrum cretén.
A turné a avrîr al spurtlén
e ló vî, l andé ed vulè
in dv ai êra anc atachè
l’òs ed sàppia col radàcc’:
l um parêva ón d Caṡalàcc’
dåpp un ân ed diêta al ṡbdèl
ch’vadda un piât ed tajadèl.
Al fé fòra, acsé in s dû pî,
òs, radàcc’, e lé par drî
int al tänp d un bâter d zéi,
al sô tién con tótt al méi.
E pó, quand l avé finé,
al s mité a guardèrum mé
con chi ucén da òmen intîr
ch’i parêven vlairum dîr:
- Mo parcôsa fèt cla fâza?
Libartè sänza magnâza
l’é un insónni e gnínt ed pió!

Pròpri alåura a m sån sintó
brîṡa pió Gujêlum Tell
ch’l avéss fât ste gran bèl quèl,
mo un “eròe” d un’ètra pâsta.
A v al dégg e pò a fâg bâsta,
a m vargåggn mo a sån dezîṡ:
pròpi in cal mumänt prezîṡ
mé a m sinté... Marco Panèla!
Tòc e dâi la zirudèla.

Papà (9/3/1967-9/3/1986)

(Un òmen d mèż’etè al câta un arlói
ch’l êra stè ed sô pèder e al s arcôrda ed ló)

E st mäntr al tänp al córr cómm una lôṡna in zîl,
Int i mumént pió dûr, quand bûra l’é la cà,
Mé avànz lé da par mé, suspaiṡ, atachè a un fîl,
Såul con al dåulz arcôrd däl tåu senbiànz, Papà.

A stâg agumislè, lighè ed malincunî,
Fagànd ṡbliṡghèr stra l man l arlói, che ancåura al và
Come quand l êra tô. Adès ch’l é dvintè mî
Al saggna al tänp luntàn di nûster żûg, Papà.

La vétta mî la vîv, la córr pr al sô sintîr,
L’arzàvv di cûlp viulént, un dé la s truncarà.
E in mèż ai pôver ṡdûz ch’i dvänten i pensîr
A trôv un såul sulîv: l’é la tô våuṡ, Papà.

I dvänten realtè, i dóbbi silenziûṡ.
Mo ancåura qué con té, sicûr, la turnarà
La fiâma ed cal fuglèr che in un barbâi ed lûṡ
La se scaldèva insàmm, nuèter dû, Papà.

Grâzie a ste vèc’ arlói s arnôva l’armunî
Di nûster sentimént. E a m vadd ancåura là,
Fangén, con tanti pòr, sénter int i cavî,
Alżîri, däl caràzz. L’é la tô man, papà.

Ste gran silänzi al s rånp, al se s-ciaréss al bûr.
Srèla l’antîga pèṡ? Srèl al tô arcôrd? Chisà.
L é nóvvel al mî côr. Mo, adèṡi, stra äl sfisûr
Spónta una spîra ed såul. L é al tô surîṡ, papà.

1985 (1985)

I an tótt i cavî grîṡ opûr i én plè,
a i vadd vgnîr só cantànd pr Indipendänza.
Incû, Ventzénc d avréll, l’é una sfilè
ed żûven d una vôlta, pén d baldanza.

I n mèrcen brîṡa al pâs, però, int i ûc’,
am pèr ed vaddri ancåura cäl falésster
ch’i fénn, quarant’ân fà, pighèr i żnûc’
ai crócc, al duce e a tótt i sû minésster.

A fâg vaddr a mî fiôl i Partigiàn
e a i dégg: “L é un bèl cortêo, vût guardèrel?”
Ló al dîṡ ed sé, pò al vôl däl spiegaziån
e a mé an um pèr vaira ed cuntintèrel.

In st mänter che mé a dscårr col mî ragâz,
ai pâsa la sfilè. E mé, guardandi,
a vadd in mèż al mócc’ Ciro, Albertâz,
William, Cicàtt, Maṡéṅna, Brén, Orlandi;

e pò Antonioni, Bergonżén, Gajàn,
con Nucci, Vicchi, Checco e Italiano
e tant ch’a n m arcôrd pió. A i strécc la man
e al ragazôl al fà: “vanno lontano?”.

Alåura mé, paziänt, par quall ch’a pòs,
a i spiêg che, sé, luntàn i én bèle stè,
parché quarant’ân fà i salténn un fòs
ch’al separèva fascio e libartè.

Al dé d incû an s sént pió fischièr cal vänt.
Mo quand l uṡèva al naigher par culåur,
i an cunbató par tótt, anc pr i ignurànt,
pr i fiû e pr i fiû di fiû, brîṡa par låur.

Pò am pèr quèṡi ed turnèr ai ténp antîg
pròpri al dé dåpp, e am vén un gran magån,
sintànd mî fiôl ch’al dîṡ con un sô amîg:
“mî pèder al cgnóss tótt i Partigiàn!”.

Maquillage (1997)

Ècco, t savéss, Maria, cm a sän cuntént!
Ai ò acatè, un ân fà, da lavurèr
come cumassa stâbil da un caplèr
e a arzàvv, de drî dal banc, tótt i cliént.

L é un sît da lússo, såtta al Pavajån,
con una clientêla ed prémma rîga
ch’l’é bôna anc ed ṡgangèr, sänza una pîga,
par un capèl, la blazza d un migliån.

Al proprietèri, pó, l é un tîp cum và:
sêri e inpecâbil da matéṅna a sîra,
ch’al pèga al sâbet, sänper in stadîra,
e l é int la sô butaiga come un rà.

Col såu cumassi, zêrt, l é un pô eṡigiänt.
Al i vôl lósstri, in åurden e cunpé,
insåmma: di dunén cunpâgn a mé
che, a n fâg par dîr, ai ò un bèl purtamänt.

Ajîr al s à riuné, ste bèl sugèt,
e sêri cme un tudàssc l à détt acsé:
- A vói che äl mî cumassi, tótt al dé,
i èven al maquillage sänper perfèt.

Csa srèl ste maquillage? Dîmel pûr té!
Mé, par ciapèri, a stâg sänza bragàtt,
pò ògni meż’åura a vâg al gabinàtt
e zétta e chiêta a m fâg un bèl bidé.

Dåu mélla e zincuantadû

(dedichè ai partigiàn bulgnîṡ)

Am capité d acunpagnèr in Piâza
un grópp d amîg franzîṡ a girundlèr
e dåpp ch’avé mustrè la mî Bulgnâza
lé dai scalén “dla pòsta” i s vlénn farmèr.

Dåu spåuṡi i rimirèven al żigànt
fagànd di suriṡén coi ûc’ ṡgranè
parché, in cal pónt prezîṡ, al monumänt
al måsstra l uṡèl dûr ala zitè.

La gêva ónna: - fôrsi l é stè al scultåur
che int al sculpîrl ai é scapè al difèt.
Cl’ètra l’arspåuṡ: - parôla mî d unåur
a vrêv, cal difèt là, avairl int al lèt!

In qualla a m acurżé d un ragazlàtt
ch’al gêva avair zîrca dågg’ ân d etè.
Fâza bugnåuṡa, giactéṅna da maicàtt
cómm al tragg’ ed tariånf caghè e spudè.

Al stèva lé, guardànd un pôc in só
vêrs al Sacrèri, fairum cómm un inṡmé,
e dåpp ch’a m fó avṡinè mé a l ò sintó
ch’al baluṡèva “demíll e sencandé”.

A i gé: - csa dèt i nómmer? Spiêgum bän,
cus’êl al quèl ch’al t à fât incantèr?
E ló, guardàndum, al sgné con una man
incåntr al mûr e l déss “i ò vló cuntèr!”.

A cal pónt lé a m sinté cómm un bigât
ch’vén fòra da una maila mèż patòca.
Che figurâza! Am pèrs ed dvintèr mât,
ròb da tirèrm al còl cunpâgn a un’ôca.

A gé tra d mé: - Cretén d un sumarnâz,
a gêva ed cgnósser bän la mî zitè
e invêzi, guèrda qué, ste ragazlâz
cuntànd i partigiàn al m à ṡmuntè.

E i partigiàn ch’as vadd là int al Sacrèri,
n i é gnínt da fèr, pûr là, tûla cum t vû,
l à raṡån cal cinâz, al n à fât ṡvèri:
i én méll pió méll, e pò zincuantadû.

E acsé a m mité anca mé a guardèr in só
insàmm a cal senpâtic franziṡén
digandi: - i én mî fradî, surèl, e pó
at żûr, tótt i bulgnîṡ i al san quant i én!

Sintànd pò äl dåu spuṡlòti coi sû scuèṡ
ch’i ṡghignazèven drî a cl uṡlâz bän fât
a urlé, dåpp ch’am salté la måssca al nèṡ:
bâsta, al n é quasst, par réddr, al sît adât!

I um guardénn tótti inspuré
cm as guèrda un mât...

La blazza dal viażèr (1988)

Ai ò girè pr al månnd come un sajån,
ai ò adruvè la mâchina, i binèri,
la nèv, la biziclatta, l areoplàn,
pò l elefànt, la bròza, al dromedèri.

Däl vôlt, an truvànd brîṡa la manîra
ed partîr, ed viażèr, ed scapèr vî,
a m sån sarvé, a l cunfès, spass e vluntîra,
dal trêno di plumón: la fantaṡî.

Che bî viâż ch’ai ò fât! E a pòs bän dîr
guardànd indrî trancuéll, con sicurazza,
d avair in tèsta sänper cal pensîr:
“viażèr, parôla mî, l é una gran blazza”.

Che blazza vàdder l’èlba int al deṡêrt,
guardèr là int l’Himalaya cäl muntâgn,
che blazza l òc’ ed Búdda sänpr avêrt
ch’an s é mâi vésst un lavurîr cunpâgn!

Che blazza, là in Ulanda, i tulipàn,
che blazza chi custómm di beduén,
chi udûr e chi culûr d un marchè indiàn,
che blazza l’Inghiltèra col Big Ben!

Che blazza Notre Dame e Montparnasse
e pò Madrid, l’Amêrica, al Perú,
l’Ucraîna e al Cânada pr andèr a pass,
che blazza la gran piâza ed Katmandú!

Però la blazza che la m tôl al fiè,
che quèṡi am fà andèr fòra ed sentimänt,
l’é sänper l’ûltma tâpa: cla zitè
in duv ai é San Ptròni col żigànt,

qualla coi pôrdg. Qualla che da luntàn
la s anónzia supêrba con cl’insaggna
ch’l’à nómm San Lócca. Mâma che emoziån,
turnànd da un viâż, psair dir: äcco Bulåggna!

Adès a l sò (1990)

(dedichè a Protogene Veronesi,
sienziè, puléttic, galantòmen
e poêta dialetèl
ch’an s pôl pió dscurdèr)

Adès a l sò
cus’ai suzêd
quand al s n in và un màsster,
adès a l sò: as erêdita.
Anca mé, ala fén d agåsst,
ai ò ereditè e a sån dvintè pió récc.
Acsé ai ò psó fèr un versamänt
int al cånt curänt di sentimént.
Int una casafôrta che inción prà mâi vudèr
ai ò asrè cl’ereditè
fâta d insegnamént.

Adès a l sò
ch’a pòs fèr al spanézz,
spànnder la munaida dl’onestè
dl’aversiån pr ignuranza, ingiustézzia, infamitè.
Adès a l sò. A sò
ch’a pòs arscôder i frût dla speranza
in un månnd ch’al séppa miåur,
parché cal màsster am l à insgnè,
con pôchi parôl e dimónndi fât,
e mé, adès, adès sé ch’a l sò:
cal màsster, cal poêta,
al n é brîṡa andè vî in sta fén d agåsst.

Adès mé a sò
ch’l avanzarà par sänper,
con la mûṡica dla sô poeṡî
dänter al côr di òmen,
dänter al mî côr,
con la lûṡ d un fûg
ch’an s pôl brîṡa ṡmurzèr.
Par quasst mé, adès ch’a l sò,
a vói cantèr ala żänt,
a vói urlèr al månnd,
a vói insugnèrum una premavaira ed pèṡ,
a vói dèr våuṡ ai silénzi,
a vói trasfurmèr in pêrel preziåuṡi
äl lègrum ed sta fén d agåsst.
L é fâzil,
a l pòs fèr trancuilamänt,
parché mé, adès, adès sé ch’a l sò.

Bibliografî conplêta (almànc fén adès) ed Gigén Lîvra - Bibliografia completa e aggiornata di Luigi Lepri