“In letèrg? Mo gnanc na stmèna!”
l’arspundêva la galèna
panza al såul par tótt al dé.
E ai amîg la i sugeré:

Agranplères só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil!

E pò dåpp sänza creanza
int l amåur fagànd na danza
da fèr vgnîr lósstr i cavî…
infurctèr sèt piat d turtî!
 

Dizionèri (linguésstica)

Gigén Lîvra con Vidèl
quand i fénn al dizionèri
i pinsénn ch'al srê stè bèl
un quèl fôra dl urdinèri:

agranplères só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil.

Scrîv e agranpla, agranpla e scrîv
tótt i dé l êra un ṡguazén
l êra al miåur di incentîv
pr arivèr prèst ala fén.

Ai êra cal Sandrén ed vî Regnôl
ch’as divartèva come un ragazôl
pr una stmèna e un èter pzôl
ai êra par ló un såul ṡgugiôl
mo i én qui ch’i suzêden
såul in vî Regnôl:

agranplères só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil.

Al srà fâzil pr un ligûr
agranplères só pr i mûr
o fèr stèr zétt un tanbûr
pr ascultèr d'avṡén di fiûr.

Mo par mé l é pió probâbil
frecuentèr däl pésst ziclâbil
che dvintèr ón aprezâbil
con poeṡî indeformâbil!

Un bèl dé, stra lómm e scûr,
ch’a zarchèva i vîc’ udûr,
a pinsé (in môd criticâbil)
«csa srèl méi pr un udåur stâbil?» 

agranplères só pr i mûr
pr ascultèr d'avṡén di fiûr.
frecuentèr däl pésst ziclâbil
con poeṡî indeformâbil?

A insfilzé al nèṡ, bän sicûr,
däntr a sî o sèt scalvadûr:
che prufómm deṡiderâbil!
Mo mé ormâi a sån inâbil...

L é un bèl quèl, la libartè.
Vó a sî lébbr ed scrîver «Ris,
Ôss, Bulògna» e ètri... pisè
ch’i én cme vlair, pròpi prezîṡ,
agranplères só pr i mûr
pr ascultèr d'avṡén di fiûr.

Lébber vó. E lébber mé
d scrîver «Rîṡ» e pò ed sustgnîr:
«Òs, Bulåggna» a i scrîv acsé!
An v piaṡrêv, canbiànd amstîr,
frecuentèr däl pésst ziclâbil
con poeṡî indeformâbil?

“T î trôp vèc’ e a m è d avîṡ
ch’an s pôl pió cójjer äl zrîṡ
e pò an s pôl, gnanc par la fâm,
arapères só pr i râm

ne agranplères só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil”.

Caro mio, l é d cal pôc
ch’a n cói zrîṡ d’atâc al brôc
però, s’äli um pâsn aṡvén
a tén dèri un muṡgutén…

“Cum t î grâs, guèrda che panza!
T è un baṡôl fôra urdinanza!
Ècco qué cus't è da fèr:
bâsta båvver e magnèr,

agranplèret só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil”

Chèro amîg, chi quî che lé
i n én brîṡa fât par mé,
såul s’a i päns a fâg fadîga,
acsé a m tén la mî butrîga.

Gât in amåur

Int una nôt ed febrèr
avän sintó di gât ṡgnulèr,
cómm s’i avéssen di gran guâi
fèr gatèra, tananâi,

agranplères só pr i mûr
pr ascultèr d'avṡén di fiûr,
frecuentèr däl pésst ziclâbil
con poeṡî indeformâbil.

Cån ste plócc ch’an s pôl capîr
a n riusêven pió a durmîr :
“E s’a féssen come låur?
Vén bän qué, ch’a fän l amåur!”

Gåmma e lèpis sänpr in man
col sudòku incû e dman
a cuntèva e ricuntèva
fén ch'i nômmer a n truvèva,

a m agranplèva só pr i mûr
pr ascultèr d avṡén di fiûr,
mo frecuentànd däl pésst ziclâbil
con poeṡî indeformâbil

ai ò dscuêrt che a poetèr
a m divêrt pió che a cuntèr,
brîṡa i nómmer, mo äl parôl
i en guintè al mî ṡgugiôl.

Incû a n ò brîṡa vójja
ed pruvèr ed fèr la spójja.
Am é vgnó un’idéa pió vèga:
s’a pruvéss ed fèr la mèga?

D agranplèrum só pr i mûr
pr ascultèr d'avṡén di fiûr,
frecuentèr däl pésst ziclâbil
con poeṡî indeformâbil.

Agranplèret? E la vétta?
Lâsa stèr, s’t an vû dla dṡdétta,
s’t è da fèr di quî coi pî,
prôva bän col poeṡî!

I “Dégg” (I “Dico”)

L’é una lażż pr i cunvivént
parché i séppen pió cuntént:
cundivîdr al patrimòni
sänza fèr un matrimòni,

agranplères só pr i mûr
pr ascultèr d'avṡén di fiûr,
frecuentèr däl pésst ziclâbil
con poeṡî indeformâbil,

e ch’as pòsa, in ògni ugnån,
avair dirétt ala pensiån,
anc s’as trâta ed dû mastién
o d dåu dòn ch’i s vôlen bän.

A Sandro Sermenghi pr an fèr di nómm

Al m à dmandè ed pruvèr a scrîver quèl,
con chi sû quâter vêrs a rémma baṡè
che ormâi i én famûṡ
e i fan acsé.
 
Agranplères só pr i mûr
pr ascultèr d'avṡén di fiûr,
frecuentèr del pésst ziclâbil
con poeṡî indeformâbil.
 
Mé a n ò capé gnanc na parôla,
e dal rèst quand a lèż on di sû pîz,
al srà parché l é un poêta ermètic,
par bän ch’la vâga
a capéss al dîṡ dal zänt ed quall ch'al dîṡ.

Riflesiån

Ṡguèrd asänt, la fnèstra avêrta
dnanz al zîl, al prè e a un’ufêrta.
Mänt fairma, la fantaṡî guèrda
vulànd e planànd, e l’ażèrda:

agranplères só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil?

Nå, che al féssti dal trêno avanza
e as trôva ṡvgnó in mèż dla stanzia
stra lîber, canàtt e un quadêren:
sócc’mel! l’é åura d andèr al infêren!

Al latin lover (1)

Al cradd d èsr un ragazèl,
al córr drî a tótti äl stanèl
luṡingàndes che par ló
mèl e vciâja i n véṅnan pió

e agraplàndes só pr i mûr
pr ascultèr d'avṡén di fiûr
al frecuänta pésst ziclâbil
con poeṡî indeformâbil.

Quand l arzàvv un suriṡén
da cla scuénzia ch’ai stä vṡén
al s inbèlza int i fitón
pò con ṡlanz al dîṡ: Pardón!

Al latin lover (2)

L’ètra sîra in cunpagnî
al fé apòsta a stèr indrî
pr aguantèrla int un stradèl
con la scûṡa ed vaddr äl strèl

agraplàndes só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil.

Al cunsómma di étto ed påvver
parché al dîṡ che un latin lover
l à biṡåggn par tgnîres só
dl eliṡîr ed żoventó.

A vrêv èsr in cal zarvèl
e pò dîri såul un quèl:
“Se un bèl dé invêzi dl amåur
at vanzéss un tèl bruṡåur

da agranplèret só pr i mûr
pr ascultèr d'avṡén di fiûr
frecuentànd däl pésst ziclâbil
con poeṡî indeformâbil!”

Al Tîvoli

Métt al Tîvoli una sîra
l é un gudiôl méi d una fîra
al cunzêrt däli ucarîn
ed tèra còta cme äl tarîn.

Pò agranplères só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil:

socuànt żuvnût ch'i fan da bån
sunèr melodî con pasiån
che äl pièṡen a tanta żänt
parché l é un san divertimänt.

Tajadléṅni

Con cla tèvla cme n altèr
a n sò côṡa la vôl fèr:
mo ch’la tîra däl spujéṅni
par tajèr däl tajadléṅni

pò agranplères só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil?

Mo anc magnèr di bî turtlón
pò de drî sucuànt puvrón,
e dåpp t at fè una limunè
par digerîr quall t è magnè!

Mesâg’ sureèl

Cavalchèr däl poeṡî
sureèl cm al fà Sandrén
sänza dîr dal bujarî
e ṡguazèr con sti żuglén,

agranplères só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil

e anc lanzèr un nôv mesâg':
as prê andèr só par San Locca
dóvv as gôd un bèl paeṡâg'
pò turnèr co’un fiåur in båcca!

Sänza vójja

Tótt i dé a s-ciapinèr,
mo che fadîga lavurèr!
Pänsa a quî ch'i én sänza vójja
e ch'i n môven gnanc na fójja,

agranplères só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil

se i avéssen dla fantaṡî
i prénn scrîver däl poeṡî
tótti quanti indeformâbil,
con cla vójja ? L é inprubâbil.

I m an détt che par st’estè
i s vôlan tôr l’eletrizitè
ṡnadrazè int i maṡnadûr
par ṡmurzèruv i calûr

e agranplères só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil.

Al poêta l é là in zémma
tótt inpgnè a zarchèr la rémma
par sintîr pôc praticâbil
mo con faid inosidâbil.

Al poêta al n é un bagiàn
ch’arpêt quall che tótt i san
mo al sà dscårrer in manîra
che ognón s vadd int la sô spcîra.

E agranplères só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil

al s regâla sensaziån
ch’pôlen dèrs cunsulaziån:
mo atenziån ch’al pôl fèr mèl
sfiurànd l’ânma e anc äl budèl!

Na poeṡî quèṡi… indeformâbil

Tótti äl vôlt ch’a vadd Sandrén
a tramm al pinsîr ch’l um véggna avṡén
e l um pòsa, na vôlta ancåura,
agredîr (mo ch’al vâga bän ala malåura!)

con: agranplères só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil.

Purtròp, dåpp ch’um sån rått la tîbia
am avanza såul ed lèżer la Bíbbia.
S’a pruvéss d agranplèrum só pr i mûr
a farêv na brótta fén, a v al żûr.

Vintâi cån la cô

Am pèr d vàddar na parôla
girèr só una cariôla,
la và drétt såura una rîga
inventè da una furmîga

pr agranplères só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil.

Una strèla la ṡgargnâza
e dal réddar la stramâza
mäntr al côl pôrta un pindâi
e la cô fà da vintâi.

Evaṡiån indeformâbil

Di cínno int al curtîl żugànd i fan dla vêrgna
e mé da stèr in cà a sént una gran lôrgna.
Sóbbit fiubèrs äl schèrp e andèr fòra,
salutèr cla ragazôla
ch’l’é drî a cójjer däl zriṡ
e la t arspånnd cån un surîṡ.

E pó agranplères só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil.

Farmèrs a dscårrer cån un gréll
Ch’am sèlta in vatta a una spâla int un spéll,
Turnèr a cà int al calèr dla sîra
E dscrûver che la vétta l’é na rôda, e ch'la gîra.
 

Castî ed sâbia

Ai ò fât un vèg insónni,
ai êra al mèr con i mî “nonni”
dóvv a fèva castî ed sâbia
ch’se ṡbriṡlèven: brótta râbia!

Lé agranplères só pr i mûr
pr ascultèr d'avṡén di fiûr
frecuentèr dal pésst ziclâbil
con poeṡî indeformâbil

fó al pensîr: csa vrèl mâi dîr?
L é difézzil da capîr,
fôrsi méi srêv dèri un tâi
che studièr da ragiunîr.

L amåur

Te t è quèl in fånnd ai ûc’
(brîṡa äl póllṡ e brîṡa i bdûc’)
ch’al fà tarmèr äl man
e al fà fèr i quî pió stran:

agranplères sò pr i mûr
ascultèr d’avṡén di fiûr
frecuentèr däl pésst ziclâbil
con poeṡî indeformâbil..

Acsé, tótt inamurè
as finéss drî da una zè
a guardèr äl strèl in zîl.
Mo che bèl! Che lavurîr!

La puléttica

I puléttic, a l savän,

i fan spass dimónndi dân

al srêv méi par tótt nuèter

se i andéssn a fèr quèl èter

cme agranplères só pr i mûr

ascultèr d’avṡén di fiûr

frecuentèr däl pésst ziclâbil

con poeṡî indeformâbil.

Nå. Fôrsi quèl èter che

a n pòs brîṡa dichiarèr:

e in camîṡa da par mé

a v al lâs qué da indvinèr.

Pôca vójja ed lavurèr

Int l andèr a lavurèr
am é vgnó vójja ed scapèr
o ed fèr un quèl mâi fât
cómm tirèr la cô al gât,

o agranplères só pr i mûr,
ascultèr d’avṡén di fiûr,
frecuentèr däl pésst ziclâbil
con poeṡî indeformâbil.

Quand a sån arivè in ufézzi
a m sån dscurdè ed tótt i vézzi
ai êra såul un quèl da fèr
a m mité drî a lavurèr.

La poeṡî indeformâbil

La poeṡî indeformâbil
Êl davaira un quèl pensâbil?
L'é però un quèl controlâbil
La prêv èsr un quèl amâbil
La prêv èser preṡentâbil
La prêv èser ascoltâbil.
Se al terêno l é friâbil
Int na gran péssta ziclâbil
L’é davaira inpensâbil
La poeṡî indeformâbil
L'é pò anc incontestâbil
Che ón che al séppa incontentâbil
E che al séppa insoportâbil
Al s adâta ló intratâbil
Int na gran péssta ziclâbil
Ad un quèl fôrsi un pôc lâbil
Anc se pò l'é intramontâbil
La poeṡî indeformâbil
Mo däl vôlt l’é inperdonâbil
Sé l’é pròpri insuperâbil
Lèżer pôc anc s'l é pensâbil
La poeṡî indeformâbil
Me a dirêv ch'l’é pôc uṡâbil
Int na gran péssta ziclâbil
Parché spass l’é pròpri instâbil
La poeṡî indeformâbil
A sperän ch'la tåurna stâbil
E quasst qué l é augurâbil
E da tótt l'é anc sperâbil
La poeṡî indeformâbil!

d agranplères só pr i mûr,
pr ascultèr d’avṡén di fiûr,
frecuentèr däl pésst ziclâbil
con poeṡî indeformâbil,

girànd nûd cum i l an fât,
tgnand in man un lîtr ed lât.
 

d agranplères só pr i mûr,
pr ascultèr d’avṡén di fiûr,
frecuentèr däl pésst ziclâbil
con poeṡî indeformâbil;

córrer drî a däl bèli spåuṡi
ch’äl parêven spiritåuṡi:
mo lé, pròpri só l pió bèl,
al se dṡdé ch’l êra int al ṡbdèl!

agranplères só pr i mûr,
pr ascultèr d’avṡén di fiûr,
frecuentèr däl pésst ziclâbil
con poeṡî indeformâbil;

al vdé córrer e saltèr
e una gran vójja ed żughèr,
fèr caràzz e gran surîṡ,
ch’al pensé d n andèr pió żå,
mo d andèr só in Paradîṡ!

agranplères só pr i mûr,
pr ascultèr d’avṡén di fiûr,
frecuentèr däl pésst ziclâbil
con poeṡî indeformâbil

da cuntèri ai sû parént,
par psair fèri acsé… cuntént

Premavaira

Fòra mèrz, ch’a sän d avréll,
premavaira l’é int un spéll!
Dscòst i pâgn e äl caparèl
a sént la vétta primurdièl!

Agranplères só pr i mûr
pr ascultèr d’avṡén di fiûr,
frecuentèr däl pésst ziclâbil
con poeṡî indeformâbil.

Al’avêrta an i é spomèti,
żänt fighétt e gnanc lechèti:
a córr dschèlz in mèż al prè,
vî al zimänt e äl falsitè!

Una bîci int n'utumèna

Agranplères só pr i mûr
pr ascultèr d avṡén di fiûr?
Frecuentèr däl pésst ziclâbil
con poeṡî indeformâbil?

Nå, nå, nå! Mé, tótt aîr,
a sån stè såura al sintîr
ch’pâsa såura al Pånt dla Biånnda
par tgnîr nåtta la sô spånnda!

Con un grâfi e sänza pòra,
in un dé avän tirè fòra
dal canèl un’utumèna,
una bîci ancåura sèna

e, adruvànd una barcatta,
un żainàtt e una casatta,
e un gran pèz d una ringhîra
ch’l êra bèle quèṡi sîra!

Èter che scrîver di vêrs!
Vlîv pasèr un dé divêrs?
Fôrza, dâi, mitîv in ånnda
con i Amîg dal Pånt dla Biånnda!

Neurolâbil

Sé! Mé a sån un neurolâbil,
schèrs ed panna, pôc afâbil,
e a sån zêrt, quasst l é sicûr:
fra dåu raig a vanz al bûr.

Agranplères só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil.

Mo và là ch’a i sån riusé,
a n sån gnanc dal tótt inṡmé!
Ècco, adès a sån iscrétt
e a l pòs dîr con bån dirétt!

Al mî gât fà äl funtanèl
s'al s insóggna quèl ed bèl
mo pò al zîga agumislè
s'al s insóggna una tumlè
e pò al gnôla con creanza
quand a i grât la cô e la panza
mo mé a päns ch'ai srêv piaṡó
d'andèr fòra, da mé e ló

e agranplères só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil

Siché dånca mé a i apäns,
e un dé fôrsi a l acuntänt!

Fagànd l ôv una galéṅna
la pinsé ala sô cuṡéṅna
ch'stèva d cà là dal Mlunzèl.
Lî la stèva int al Pradèl,
e acsé pr arivèr fén là
la téns tôrs fòra d'in cà,

agranplères só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil.

Mo quand l'arivé là só
quèṡi ai vgnêva al mèl cadó:
sô cuṡéṅna la nudèva
int na pgnâta ch's arscaldèva!

Par scanpèr ali eleziån
al strulghèva Barluscån
tótt i dé un'ufèla nôva.
Acsé al vlêva fèr la prôva

d agranplères só pr i mûr
ascultèr d'avṡén di fiûr
frecuentèr däl pésst ziclâbil
con poesî indeformâbil.

Mo sta prôva l'andé mèl:
i al mandénn int al canèl
na gran pèrt di sû eletûr.
Pôvra bîstia, che figûr!

Un sumâr däntr int la stâla
s insugnèva cla cavâla
e ai prilèva la mazòca:
al pinsé par la sô còca

d agranplères só pr i mûr
ascultèr d'avṡén di fiûr
frecuentèr däl pésst ziclâbil
con poesî indeformâbil.

Mo atachè con un ligâm
a un scudòz d un gran rutâm
al s farmèva dåpp trî pâs:
che hi-ho, e che scuncuâs!

Agranplères só pr i mûr:
se an i é brîṡa in dóvv ciapères
al pèr fâzil però aténti,
ch’ai é môd d scaravultères.

Ascultèr d'avṡén di fiûr:
una vôlta a i ò pruvè,
int al prè a m sån mess a żèżer
e dåu èv i m an pzighè.

Frecuentèr däl pésst ziclâbil:
l'é andè bän par dåu matén
mo però la têrza vôlta...
m é vgnó adòs un muturén.

Con poeṡî indeformâbil:
a vrêv scrîver anca mé,
mo ala fén am vén un dóbbi:
chi m ascåulta arèl capé?

Al scuadrån dal s-santacuâter
un spetâcuel da teâter,
con na móccia ed żugadûr
che sänz'èter i êrn i miûr;
incû al stadio, s't vû un cunséi,
brîṡa andèr parché l é méi

agranplères só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil:

lâsa pêrder al balån
ch'an dà pió sudisfaziån,
fà un viażtén con la tó spåuṡa
e, s't î żåuven, và mò a amråuṡa.

S'a vlî scrîver däl poeṡî
rispetànd dla rémma i pî
ai é äl rêgol da tgnîr drî
e pò… ai vôl dla fantaṡî:

agranplères só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil.

L é un eṡämpi, cómm a vdî,
ch'a psî dîr tótt quall ch'a vlî
rispetànd dla rémma i pî
e druvànd la fantaṡî.

Fôrsi mé a sån tròp créttic
quand a dégg che i puléttic
quall ch’i dîṡen t’an capéss,
acsé té t i mandaréss

a agranplères só pr i mûr
pr ascultèr d'avṡén di fiûr
frecuentèr däl pésst ziclâbil
con poeṡî indeformâbil;

e pò dåpp, fât st'esperiänza,
s'i an un pôc d inteligiänza,
quand i s trôven con la żänt
dscårrer pió semplizemänt.

Tótt l inveren a mostre al gamb
con la mi rason par al mandg
al dutor fort id la su fama
l ha mostrè sampar la lama

pr agranplères só pr i mûr
pr ascultèr d'asvén di fiûr
frecuentèr dal pésst ziclâbil
con poesî indeformâbil.

Am piasrê id cuntrulèr
quand finéss al carenvèl
pr an truvèr degli èter dsgrâzi
a pruven a creser al prezi.

Dåu ciâcher

Murtadèla in mèz al pan
zâpa in man cum un vilàn
in tal canp cavèr gl'urtîg
e dåu ciâcher con di amîg

pr agranpleres só pr i mûr
par scultèr d'asvén di fiûr
frecuentèr dal pésst ziclâbil
con poesî indeformâbil!

Pr al chèp clùbb di ciocapiât
i mî vérs i in bèla fât.
Al mî "idioma" l é quest qué
ala dménga e al dé din dé.

I strichétt

Una sfojja par i strichétt
ai ò tirè con al matarèl
par al master dal dialètt
al su piat originel

e agranpleres só pr i mûr
par scultèr d'asvén di fiûr
frecuentèr dal pésst ziclâbil
con poesî indeformâbil.

Indeformabil l’é vgnò acsé
pr’an zigher qué da par mé
cume i feven anc i antigh
a fer festa con di amigh.

Al campanel

Ste dialett ch'a voi tgnir só
scriver anc souver a un giurnèl
sol con Sandro da un "oblò"
a poss apanna menzionel.

agranpleres só pr i mûr
par scultèr d'asvén di fiûr
frecuentèr dal pésst ziclâbil
con poesî indeformâbil.

Tott al gropp dla Fatturi
dal furor dal carenvel
i n um sinten me di dri
gnanc sa son un campanel.

Zént éuro

Siri fà, incuntré 'na dona
bèla, avérta ed bòca bóna
nèca a norma in t1a statûra
dis: “Zent euro, la fatûra...

pò agranplères só pr’i mûr
pr ascultèr da vsén di fiûr
frecuentèr däl pésst ziclâbil
con poesî indeformâbil."

Sé, va bén, mo ui vrà paziénza
a farén sta penitenza
tira e dai, cipolla, briga
pagarò, mo an cunsomm miga.

Cor indeformabil

Sémpar sénsa un grand'amór
m'ascavéss, a son in rabia
sot'al pés d'al me dulór
vrev savér: mi com a fàghia!

Agranplèrs só e źà pr’i mûr
pr’ascultèr d’avśén di fiûr
frecuentèr däl pésst ziclâbil
con poeśî indeformâbil?

E indeformabil l'é 'l cór
dur e téndr'acmè la sabia
arnovabil cmè 'l sudór
trist acmè l'usel in gabia.

La Pìcola

Lóng 'd la vècia ferovia
i'an avert na nóva via
da San Flis fin al Finèl
par tut i'amigh dal pedèl.

Agranplèrs só e źà pr’i mûr
pr’ascultèr d’avśén di fiûr
frecuentèr däl pésst ziclâbil
con poeśî indeformâbil?

Ma 'l trenin col so sivèl
quel 'd la SEFTA , in du'èl?
Al fa part ormai dla storia
indeformabil memoria.

Benvenga maggio

"Giunge il maggio" anca st'an
e gramémia o fémia pan,
con i òc sra e camisa avèrta
al sól at par na lusèrta.

Agranplèrs só e źà pr’i mûr
pr’ascultèr d’avśén di fiûr
frecuentèr däl pésst ziclâbil
con poeśî indeformâbil?

Mè 't parl, tè 't fa finta 'd gninta
e ènch al nuvl'i ha mis la grinta,
tè fa pur l'indeformabil
ma mè a tógh l'impermeabil.

Fioriduri 'd primavera

La stagion ormai l'avènsa,
tanti dóni con la pènsa
parchè 'l Cardinal Ruini
l'ha 'rcmandà 'd fèr "più bambini".

Agranplèrs só e źà pr’i mûr
pr’ascultèr d’avśén di fiûr
frecuentèr däl pésst ziclâbil
con poeśî indeformâbil?

Il's deforma al dóni inveci
dì par dì 'l dventa vèci,
se i fio'i cres'n incora un po'
'dvintaran tut co-co-co.

Al stranpalè

Bän mo adès ai é Sandrén
ch'l é un povêta birichén,
ch'vôl ch'a scrîva in poeṡî
dû o trî vêrs ed fantaṡî:

agranplères só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil.

Mo mé a päns ch'al srêv pò méi
d an tgnîr drî a ste cunséi,
e andèr drétt par la mî strè
e an fèr brîṡa al stranpalè.

L’anbulanza d Êzio

L'ètra sîra a sòn andè
con i amîg al'ustarî
a n al sò cs'avèn magnè
mo ala fén a sèn vgnó vî
quèṡi tótt cól mèl ed panza
da fèr vgnîr anc l'anbulanza.

Ala nòt, tra l prélla e gîra,
a n truvèva la manîra
ed durmîr, e alòura a gé:
vût mò vèddar che stanòt
l é al mumènt ch'a n sòn pió mé
e a pòs scrîver di stranbòt
in dialètt... com un inṡmé?

A um prufétt ed ste mumènt
ch'a sòn fòra ed sentimènt
par fèr dîr ala mi pènna
dal strulghè ch’i stag-n in rémma,
e a cuntènt l amîg Sandrén
ch'vôl ch'a scrîva in poveṡî
dal parôl ed fantaṡî
cómm as fà s'as bèvv tròp vén:

agranplères só pr i mûr
ascultèr d'avṡén di fiûr
frecuentèr däl pésst ziclâbil
con poeṡî indeformâbil!

Mo, ala fén, ai ò pinsè
ch'al n é brîṡa al môd quasst qué
ed mustrèr quall ch'l é par mé
al môd ed fèr dla poveṡî.

E alòura, prémma ed tótt,
a n vâg pió in cl'ustarî
ch'a n vói pió èsar ardótt
col mèl d panza da trèr vî,
e a Sandrén arspònnd ch'am scûṡa
s'an sòn brîṡa bòn ed fèr
quall ch'ai détta la sô mûṡa
... e pò alòura... lasèn stèr.

Un insónni stranpalè

L'ètra nòt ai ò sugnè
un insónni stranpalè.-
A pinsèva d èsar dṡdè
mäntr invêzi mé a durmèva
(mo però mé a n al savèva
d èser pròpri indurmintè).

E alåura ai ò sugnè:
d agranplèrem só pr i mûr
pr ascultèr d'avṡén di fiûr
frecuentèr dal pésst ziclâbil
con poeṡî indeformâbil.

Sócc’mel mò, che pò ala fén
a m sån dṡdè con al pinsîr:
o ch'a sån dvintè cretén,
o ch'a sån dvintè poêta,
(un poêta stranpalè).

A n savèva pió csa dîr
par savèir quall ch'l êra stè:
l êra stè un pinsîr da dṡdè
o a l avèva såul sugnè?

Al poêta ed Vî Regnôl

Ai é ón ch'stà in vî Regnôl
che l'é un tîp originèl;
ló l armaṡṡda däl parôl
tótti däntr al sô capèl
pò al i arbèlta int un tulîr
e al li tâca pò a spartîr
come se l avéss la vójja
ed tirèr dåu ôv ed spójja.

E pò dåpp l inpâsta e in zémma
al i métt un pôc ed rémma,
al i strécca, spénnż e tîra
fén ch'an trôva la manîra
ed parżèr col matarèl
cómm s'al féss däl tajadèl.

E savîv cs’ai sèlta fòra?
Con curâg’ e sänza pòra
ló al dîṡ ch'i én däl poeṡî,
ch'i én di vêrs... "indeformâbil"
(mo anc i can i scâpen vî
quand al lèż i vêrs pió amâbil).

L é cunvént, e mé a v al żûr,
che sti vêrs i én i sû miûr.-
Stè da sénter se i én bî
o s'i én fât såul con i pî:

Agranplères só pr i mûr
pr ascultèr d'avṡén di fiûr
frecuentèr däl pèsst ziclâbil
con poeṡî indeformâbil.

Mo, ala fén, biṡåggna dîr
che Sandrén l é un gran amîg
ch'l é un piaṡair a stèri sîg
e, in ażónta, par finîr,
che, a sô môd, l é un gran poêta,
un poêta "stranpalè"
cgnusó in tótta la zitè.